ក្រុងបាងកកៈ រដ្ឋាភិបាលថៃមានបំណងលក់អង្ករចំនួន ២ លានតោននៅឆ្នាំនេះតាមរយៈកិច្ចព្រមព្រៀងរវាងរដ្ឋាភិបាល និងរដ្ឋាភិបាល (G2G)។
ប៉ុន្តែរដ្ឋាភិបាលថៃបានសារភាពថាការប៉ុនប៉ងជាថ្មីនៅក្នុងការលក់អង្ករទៅឲ្យប្រទេសអ៊ីរ៉ង់អាចនឹងមានបញ្ហាដោយសារការកើនឡើងកម្ដៅជម្លោះនយោបាយក្នុងតំបន់មជ្ឈិមបូព៌ា។
លោកស្រី Chutima Bunyapraphasara លេខាធិការអចិន្ត្រៃយ៍នៃក្រសួងពាណិជ្ជកម្មថៃបានថ្លែងថារដ្ឋាភិបាលមានអនុស្សរណៈយោគយល់ (MoU) មួយជាមួយប្រទេសចិនដើម្បីលក់អង្ករចំនួន ១ លានតោន។
រដ្ឋមន្ត្រីក្រសួងពាណិជ្ជកម្មលោកស្រី Apiradi Tantraporn said បានថ្លែងកាលពីដើមខែធ្នូឆ្នាំមុនថារដ្ឋាភិបាលរំពឹងថានឹងចុះកិច្ចព្រមព្រៀងមួយក្នុងពេលឆាប់ៗនេះដើម្បីលក់អង្ករចំនួន ១ លានតោនបន្ថែមទៀតទៅឲ្យប្រទេសចិន។
ការប្រកាសរបស់អ្នកស្រី Apiradi បានធ្វើឡើងបន្ទាប់ពីក្រសួងពាណិជ្ជកម្មបានចុះកិច្ចព្រមព្រៀងមួយដើម្បីលក់អង្ករចំនួន ១ លានតោនទៅឲ្យសាជីវកម្មគ្រាប់ធញ្ញជាតិ ប្រេង និងអាហារជាតិចិនដែលជាក្រុមហ៊ុនរដ្ឋចិន។
កិច្ចព្រមព្រៀងកាលពីថ្ងៃទី ៣ ខែធ្នូនេះគឺជាផ្នែកមួយនៃកិច្ចព្រមព្រៀងលក់អង្ករចំនួន ២ លានតោនដែលប្រទេសថៃ និងចិនបានចុះហត្ថលេខាលើអនុស្សរណៈនៃការយោគយល់កាលពីខែធ្នូ ឆ្នាំ ២០១៤។
ការចែកចាយអង្ករមានចំនួន ១ សែនតោនក្នុងមួយខែដោយចាប់ផ្តើមពីដើមឆ្នាំនេះទៅ។
លើសពីនេះទៀតប្រទេសថៃស្ថិតក្នុងដំណើរការនៃការចែកចាយអង្ករដែលនៅសេសសល់ចំនួន ១ សែនតោនទៅឲ្យប្រទេសចិនស្ថិតក្រោមកិច្ចព្រមព្រៀងលក់អង្ករ ១ លានតោននាពេលកន្លងមកដែលសម្រេចបានក្រោមរដ្ឋាភិបាលរបស់លោកស្រី យីងឡាក់។
លោកស្រី Chutima បានថ្លែងថាការលក់អង្ករបន្ថែមរំពឹងថានឹងទទួលបានពីប្រទេសឥណ្ឌូនេស៊ី និងហ្វីលីពីនដោយសារការរំពឹងថានឹងមានការផ្គត់ផ្គង់ទាបដែលបង្កឡើងដោយគ្រោះរាំងស្ងួត។
ក្រសួងពាណិជ្ជកម្មបានកំណត់ទិសដៅនាំចេញអង្ករនៅឆ្នាំនេះចំនួន ៩ លានតោនដែលមានតម្លៃ ៤,៧៨ ពាន់លានដុល្លារ។
កាលពីឆ្នាំមុនថៃត្រូវបានព្យាករថានឹងនាំចេញអង្ករបាន ១០ លានតោនដែលមានតម្លៃ ៥,១ ពាន់លានដុល្លារ៕
ប្រភព៖ ភ្នំពេញប៉ុស្តិ៍